Nuna najugaq ilinniakkap naammassereernerata kingorna

Ilinniarlutik naammassisartut amerliartortillugit nunanut allanut ilinniariartortartut aamma amerlaneriartuinnarput. Ilaatigut maani ilinniaqqiffiit amerlasuut peqannginnerat pissutaalluni ilinniaqqinniarlutik aallartartut amerlanerupput. 2003-mut sanilliullugu maanna ilinniaqqinniarlutik aallartartut 45 pct.-inik amerlanerupput.

2017-imi ilinniarnermik aallussisut akornanni 35 pct.-it nunani allani ilinniartuupput. Ilinniarlutik naammassisut ilaat Kalaallit Nunaannut angerlartarput ilaat nunanut allanut nunasisartut.

Nunani allani ilinniartut

2003-miit 2017-imut inuussutissarsiummik[1]nunani allani ilinniagaqarsimasut ilinniarnerup naammassineranit ukioq ataaseq qaangiukkaangat 63 pct.-it nunani allani najugaqartarsimapput. Taakkunannga 22 pct.-it ilinniaqqittarsimapput. Nalinginnaanerpaavoq ilinniartut bacheloritut naammassinikut kandidatinngorniartarnerat. Titartakkami 1-imi takuneqarsinnaavoq ilinniakkap naammassineranit ukiut marluk siulliit ingerlaneranni ilinniaqqinnermik aallussisut amerlanerusartut. Ilinniaqqinnermik aallussisut ikiliartornera ilutigalugu Kalaallit Nunaannut utertartut amerliartorput.

 

Titartagaq 1. 2003-mit 2017-imut nunani allani ilinniakkamik naammassisut najugaqarfii

Nassuiaat: Inuussutissarsiummik ilinniarnerit aamma ilinniaqqinnerit taamaallaat ilaapput.

Najoqqutaq: Naatsorsueqqissaartarfik – Kisitsisaataasivimmi kisitsisit takukkit (http://bank.stat.gl/UDNBD1)

 

Nunani allani ilinniarlutik naammassisut 37 pct.-ii ukioq ataaseq qaangiukkaangat Kalaallit Nunaanni najugaqartarput. Ilinniarluni naammassereernerup kingorna ukiut ingerlanerini Kalaallit Nunaannut nuuttartut amerlatsikkiartortarput, ilinniakkamik naammassinninnerup kingorna ukiut 8-t qaangiunnerini Kalaallit Nunaannut nuuttut amerlanerpaajusarput. Nunani allani ilinniarluni naammassinermit ukiut 8-t qaangiunnerini 56 pct.-it Kalaallit Nunaanni najugaqartarput.

Kalaallit Nunaannut utertartut amerlassusaat taamaaginnarpoq

Nunani allani ilinniarlutik naammassisartut ikinnerat eqqarsaatigisariaqarpoq ukiut ingerlaneranni sanilliussinermi. Nunani allani ilinniarlutik naammassisut ikinneri pissutigalugit ukiut pingasukkaarlugit agguaqatigiissitsisoqarpoq, kisitsisit ikikkaangata nikittoqalaaraangat inernerinik sunniingaatiartarnerat pinaveersaarnialugu.

 

Nunani allani ilinniarlutik naammassisimasut Kalaallit Nunaannut nuussimasut amerlassusaat ukiuni kingullerni nikippiarsimanngillat. Ilinniarluni naammassinermit ukioq ataaseq imaluunniit marluk qaangiunnerinit Kalaallit Nunaannut utersimasut amerlassusaat nikeralaarput. Ukiut pingajuanni Kalaallit Nunaannut utertartut amerlassusaat patajaannerulerput. 2003-miit 2005-imut nunani allani ilinniarlutik naammassisimasut Kalaallit Nunaannut utersimasut ukiunut tulliuttunut naammassisunut sanilliullugu amerlanerupput.

 

Nunanut allanut ilinniariartut amerlanerulersimagaluartut ilinniareerlutik Kalaallit Nunaannut utertartut agguaqatigiissillugu amerlassusaat allanngorsimanngilaq.

 

Titartagaq 2: 2003-mit 2014-imut nunani allani ilinniarlutik naammassisut akornannit Kalaallit Nunaannut utertartut amerlassusaat, ukiut pingasukkaarlugit

Nassuiaat: Inuussutissarsiummik ilinniarnerit aamma ilinniaqqinnerit taamaallaat ilaapput.

Najoqqutaq: Naatsorsueqqissaartarfik – Kisitsisaataasivi